Falans Furlans
Straniir, extracomunitari, marochin. Chistis les denominazions par segna a det al forest ca di no.
Ma, cuant che al forest o sin... noatris?
In Gnove Zelande, sgarfant furlans o ai imparat che i Maori e clamin i blancs 'pakeha' une peraule (dal significat no ben clar) che comuncue e vul disi plui o mancul 'forèst' che e a cur di urta, ancjemo in di di vue, cualchi blanc. Maori, invesite, al ul di "normal". Quindi.... Maori=normal e Pakeha=forest, fur dal 'normal'...
In Australie, i blancs e clamavin (ma al samee che plui di cualchidun chistis peraulis les dopri ancjemo) i talians 'degos', e i mediterraneos in gjenar 'wags'. Chistis peraulis, mi par di capi des mes intervistis, no erin (e no son ancje in di di vue) peraulis propite tant 'finutis'.
In Thailandie, al forest al ven clamat 'falan'. No je une peraule tant dispregiative, ma ...in font....mi disis i furlans... se tu ses un falan tu ses simpri un falan. I falan, tant par di une, no an nancje dirit di compra un teren, parvie che le tiare e je dal re (guai a tocja al re...) e che le tiare dal re e je dome ed esclusivamentri pai tailandes. Casomai, un falan al po compra un apartament dal prin plan in su, che nol tocje tiare e quindi al va ben ancje par un falan. Ancje par un falan furlan.
Nuttika e je une zovine di Bangkok che o ai cognossut cuant che e stave in Italie. Di un pos di mes e je tornade a sta a Bangkok e mi ospite te cjase a nord dal centri citat dula che e vif cule so famee. Sgarfa furlans a Bangkok no je propite une robe di nie, bisugne capi cemut che e funsione le citat e di ce bande girasi. Nuttika, a chist propuesit, e ven nomenade di me Sgarfefurlans assistant manager uficial di Bangkok, par judami a disberdeami cule barieris lenghistichis e cui problemas di alfabet.
Siccome fa al sgarfefurlans al'e un mistir dur ( difati al e stat di resint inserit te famose liste dai lavori logoranti) o ai decidut di fami fa un massagjo thai di un tipo che e cognos Nut, che si clame San.
Che al alzi le man cui che cuant che si fedele di massaggio thai nol pense a une biele zovine che e rit, sot di une palme, che ti massaggie cul vueli di cocco e che magari ti incite a ogni sporcjarie.
Nononono, biele int, o ves sbaliat dut. San, chist bocon di mat, apene che mi viot mi dis che o ai mase 'tensions' e che lui al mi dismole in tic e tac. Agh, e ce dismolade..... al e mior la dal dentist cence anestesie o parturi tre gimui cence cesareo tal ospedal di buse dai veris. Ae fin mi vasara tre (!) masagjos di tre oris dal'un tipo sante inquisizion, che podopo mi soi domandat cui che mal a fat fa a di di si.
Al sgarfefurlans, grazie al so trainer massaggiator- di tipo thai box-, al e pero une vore elastic, smolat, atif. O cjapi su une motorette-taxi e o voi a cjata Gianni Favro, di Pordenon, che al a un ristorant te Soi Tonson de Polenchit Road, al numar 34.. Gianni al e simpri stat affascinat de indocine, dai timps di Sandokan.
Al so ristorant al'e un cjanton di paradis -tal miez dal fiscodidio- apene 30 metros fur de strade principal, dula che si mangje un poc di dut, ancje furlan, oviamentri. Cun Gianni o cjati ancje Massimo, un commerciant romagnul di piastrellis une vore tabaiot. Massimo mi spieghe che Gianni al'e une vore quotat e che al fas ancje catering pe famee dal re. Cuisa se le famee real e a mai provat al muset cule bruade di Gianni...
No tant lontan di Gianni, tal soi 23 de Sukhumvit (une des stradis principai di Bangkok) o voi a cjata Fabio Colautti, originari dai Ris, apene fur di Udin. Ancje Fabio al'a viart un ristorant (Giusto) une vore biel, tra i plui impuartants de citat. Agns indaur, al are a vore in Gjermanie e i an ufiarte chiste posibilitat di vigni a vore e planta su un business achi in tiare thai. Dite, fate.
Une de sos specialitats e je che dal frico, ma chel dur, i ten a sottolinea. In some, se a cualchi furlan che si cjate di chistis bandis i ven le nostalgie culinarie, nie pore, a Bangkok in jenfri dai centenars (!!) di ristorants talians, e son ancje ristorants.. furlans, dula mancja polente e frico, persut di San Denel e formadi Montasio.
Fabio e Gianni, ta chiste prime fase, mi an ducj e doi judat a sgarfa fur al telefono di cualchi atri furlan. E vegnin fur tancj noms di falans-furlans che e lavorin tal mont de ristorazion, cualchi consulent dal mont metalmecanic, dai imprenditors., Al ven fur ancje al nom dai Collavini -che e an une fabbriche di lins di ocjai- che mi ripromet di la a cjata apene fur di Bangkok, a Notanmburi, al prin pusibil. Cusi, i doi un colp di telefono par metimi d'acuardi.
3 votes 
