Granada

  Granada, Andalusia, Spain and Canary Islands
Wednesday, June 17, 2009

Jetzt simer in Granada sit gester abig, ehrlich gseit simer rächt
entüüscht vo derä Stadt. Hüt gömer d Al Hambra go ahluege, hoffe das
isch guet.
Eusäs Hostel da isch nöd würkli was versproche worde
isch. S isch erste Hostel wo nöd guet isch. Sie säget im Internet sie
heget ä Dachterasse, oder Internet wo nöd dä Fall isch. D Bedienig a dä
Reception isch meeeeeeeeeega unfründlich und au d Stadt sälber isch
mege schmudelig und äs hät irgendwie rächt viel so penner/junkie Lüüt
ume. Darum händ mir entschiede, dass mir morn über d Sierra Nevada
wiiterziehnd nach Nerja, isch am Meer und eus det na äs paar schöni Täg
machet.

Vo Cordoba us hämer d Josefin mitgnah, sie isch ä Australierin, reist
allei und hät au am gliiche Tag vo Cordoba uf Grenada welle, also hämer
sie mitgnah i eusäm Mietauto.

Jetzt bini gspannt uft al Hambra.



Ich wünsch eu allne ä super gueti Ziit und nämmets nöd z stressig.



Evi

___________________________________________________________________________

hello,

irgendwie hät eus die stadt nöd gern und will eus wider los-ha.
ok, nach cordoba gits wohl kei steigerig meh. aber trotzdem. s'einte isch,dass s'hostal im internet sache anpreist,wo nacher nöd stimmed (dachterasse, wi-fi etc) und andersits für jede chli mist stolzi beträg verlangt (7eur für e wösch, 10eur für de parkplatz pro tag, ein kopfkissenbezug zwenig übrig, kei tüechli.gester sinds cho und händ gfunde sie brüched de safe us eusem zimmer etc). die vodr reception hät d'höflichkeit nöd grad erfunde.
gester hämmer dänn welle euses auto us de tiefgarage hole und öffentlich parkiere. me muen dänn mit em auto uf so e art hebebühne fahre (lift) und dänn wirds is EG befördert. uf halbem weg isch plötzlich alles steckeblibe und kei strom meh im hotel...haha...und euses auto idr hälfti vom weg ufem lift und ich drin ine. die nett frau hät gfunde,ich müesse im auto blibe bis de elektriker cho segi.....in spanie cha das ja mal 1-2täg gah :-). ich ha gfunde das chöni sie aber 100%ig vergässe und bin usgstiege und vom lift gumpet.
dänn händ mir s auto uf emne normal markierte parkplatz abgstellt und es ticket glöst. will mir dänn id alhambra sind, sind mir bitz zu spat zrug-cho zum nachzahle. das hät sich aber eh erübrigt,will s auto bereits abgschleppt gsi isch!
wänn mr bedenkt,dass die spanier ihri autos a jedem na so unmöglich platz abstellet (teilwis eifach anere kreuzung mitte uf de strass oder ide schmälste gasse wo nacher niemert meh dure chan, dänn isch das scho bitz schwer zum verstah,wieso mir nöd eifach e buess bechömed sondern abgschleppt werded....vomne parkplatz, wo s auto niemert stört oder behindert.
naja.....e 100euro-experience :-)
isch nöd ganz eifach zum usefinde,wi mr sis auto dänn wider becho chan und vorallem wo genau. (die händ sich vilicht gseit: selberschuld. en echte backpacker hät keis mietauto! ;-)

au sust gfallt eus d stadt nöd....kei flair. dreckig, volle penner und alkis und alles enorm übertürt (tapas kasch vergässe da).

bier und alhambra-aussicht

stuck

defür isch d'alhambra überwältigend gsi...unglaublich die schnitzerien uf hunderte (tusige?) vo quadratmeter in feinster und zierlichster art und weise in stein gemeisselt. enorm.
die maure händ scho gwüsst wie mr gnüsst. schöni gärte mit wasserspiel etc.

naja...ich lahn d'föteli für sich spreche. möcht da nöd alli einfügen, aber me chan ja bitz oberhalb alli einzeln aluege (lohnt sich).....eifach oben anklicken (show all thumbnails) und dänn die einzelne fotos anklicken zum beschrieb läse.




so...mir bruched en kaffi und dänn gahts id sierra nevada go wandere! :-)
endli mini grausam schnelle aircondition-trekking-schuh montiere und usprobiere.juhuuuu.

d´josephine hät eus iglade nach melbourne (australien) und e anderi für nach brisbane. wär e tolli möglichkeit zum gratis wohne für nach neuseeland, falls mir dänn na geld und lust zum witerreise hätted :-)


greets
domi